Acts 27

UPhawuli Uwelela ERoma

1Sekumisiwe ukuthi sizawelela e-Ithali, uPhawuli kanye lezinye izibotshwa banikelwa ezandleni zomphathi wekhulu owayethiwa nguJuliyu owaye ngoweButho laseSikhosini. 2Sakhwela umkhumbi e-Adramithiyumi owawusulungele ukuwelela emathekwini asemakhunjini esifunda sase-Asiya, satsho salungena ulwandle. U-Aristakhu, umMakhedoniya osuka eThesalonika waye lathi.

3Ngakusasa sakhuphukela eSidoni; kwathi uJuliyu watshengisa umusa kuPhawuli wamvumela ukuthi aye kubangane bakhe bamenzele lokho ayengabe wayekuswela.

4Sesisuka lapho saluqonda ulwandle njalo sagudla ethunzini laseKhuphro ngoba ukuvunguza komoya kwakuphambene lathi.

5Sathi sesiwele sadabula ulwandle olubanzi malungana lamakhumbi aseKhilikhiya lePhamfiliya, sakhuphukela eMira eseLikhiya.

6Khonapho umphathi wekhulu wafumana umkhumbi wase-Alekizandriya uwelela e-Ithali, wasingenisa kuwo. 7Sahamba sitotoba okwezinsuku ezinengi sathwala nzima ukuyafika eKhinidu. Kwathi ngoba umoya usivalela ukuthi sihambe ngendlela yethu, sawela sayagudla ethunzini laseKhrethe, malungana leSalimone. 8Sahamba siceza ekhunjini sihamba nzima safika endaweni ethiwa Mathekumahle, eduze ledolobho laseLaseya.

9Sasesilahlekelwe yisikhathi esinengi kakhulu, lokuhamba elwandle kwasekuyingozi kabi ngoba ngalesi isikhathi kwasekungemuva kwesikhathi seZilo. Yikho uPhawuli wabaxwayisa wathi, 10“Madoda, ngibona ukuthi uhambo lolu luzakuba lengozi lomonakalo omkhulu, kubhidlike umkhumbi lezimpahla, lezimpilo zethu lathi.” 11Kodwa umphathi wekhulu, esikhundleni sokulalela lokho okwakutshiwo nguPhawuli, walandela iseluleko somtshayeli womkhumbi kanye lomnikazi wawo. 12Njengoba itheku lalingelihle ukukanisa khona ebusika, abanengi bakhetha ukuthi siqhubeke siwele njalo, bethemba ukuthi sizafika eFenikhe sikanise khona ebusika lobo. Leli kwakulitheku eliseKhrethe, elalikhangele eningizimu yentshonalanga njalo lenyakatho yentshonalanga.

Isiphepho

13Kwathi ngokuphephetha umoya opholileyo waseningizimu, banakana ukuthi basebekutholile ababekudinga; yikho bawukhulula umkhumbi wawela ulandela ikhumbi laseKhrethe.

14Kungakabi ngaphi umoya olamandla esivunguvungu owawuthiwa “yiNhlampumalanga” waphenquza usuka esihlengeni.

15Umkhumbi watshaywa yilesosiphepho wehluleka ukuqondana lomoya; yikho wasehlula sasesindenda nje siwulandela. 16Sathi lapho sidlula ekusithekeni kwesihlenge esincane esithiwa yiKhawuda, kwasekusala lokuthi simise kuhle isikepe sokuphephela siqonde.

17Kwathi amadoda esesidonsele phezulu emkhunjini, basebethandela izintambo bebopha umkhumbi ngokwawo ukuze uqine ndawonye. Bathi ngoba besesaba ukuthi bazatshayeka emhlabathini wetshebetshebe laseSithisi, behlisa iseyili bayekela umkhumbi wazindendela nje. 18Isiphepho sasizunguza kabuhlungu kwazekwathi ngosuku olulandelayo saqalisa ukujikela umthwalo olwandle. 19Ngosuku lwesithathu baphosela phandle ngezabo izandla izintambo lezinye izimpahla ezokuhambisa umkhumbi. 20Kwathi sekuyizinsuku ezinengi singaliboni ilanga loba izinkanyezi, kodwa isiphepho silokhu sisidla ubhedu, saphelelwa lithemba lokuthi sizaphepha.

21Amadoda ayesehlale isikhathi eside engadlanga, yikho uPhawuli wasesima phambi kwabo, wathi: “Madoda, ngabe lingilalele asaze sawela ukusuka eKhrethe; ngabe kalizifakanga phakathi kwale inhlekenhleke lokulahlekelwa lokhu. 22Kodwa manje ngiyalikhuthaza ukuthi lime isibindi, ngokuba kakukho lamunye wenu ozakufa; ngumkhumbi kuphela ozabhidlika.

23Izolo ebusuku ingilosi kaNkulunkulu mina engingowakhe njalo engimkhonzayo ime phambi kwami 24yathi, ‘Ungesabi, Phawuli. Kumele uyothonisiswa nguKhesari; njalo uNkulunkulu usebe lomusa wokukunika izimpilo zabo bonke owela labo.’ 25Ngakho manini isibindi, madoda, ngokuba ngilethemba kuye uNkulunkulu ukuthi kuzakwenzakala njengokungitshela kwakhe. 26Kodwa phela sisezake sitshayeke phansi sikhaphazelwe esihlengeni esithile.”

Ukubhidlika Komkhumbi

27Ngobusuku betshumi lane sasilokhu siyaluziswa eLwandle lwe-Adriyathikhu, lapho okwathi abaqhubi bomkhumbi bezwa kungathi sasisondela emhlabathini. 28Baphosa izintambo zokulinganisa bafumana ukuthi amanzi ayezike okwezingalo ezilikhulu elilamatshumi amabili. Ngemva kwesikhatshana baphinda baziphosa njalo bafumana izingalo ezingamatshumi aficamunye ukuzika. 29Bathi ngoba besesaba ukuthi sasizasakazeka ematsheni base besehlisa izisindo zokumisa umkhumbi ngemuva bekhalela ukuthi kuse. 30Abaqhubi bomkhumbi bazama ukunyenya babaleke emkhunjini ngokwehlisela isikepe sokusinda elwandle ngengwegwe lokuthi babesiyakwehlisa ezinye izisindo ngaphambili komkhumbi. 31Yikho uPhawuli wasesithi kumphathi wekhulu lakumabutho, “Uma amadoda la engahlali emkhunjini lingeke lisinde.” 32Yikho amabutho asequma izintambo ezazibambe isikepe sokusinda asiyekela sayagxumukela le.

33Sekubanga emathathakusa uPhawuli wabakhuthaza bonke ukuthi badle. Wathi, “Okwezinsuku ezilitshumi lane ezidlulileyo belihlezi libambe amaphaphu enu lisehluleka lokudla – kalizange lidle lutho. 34Okwamanje ngilicela ukuthi lidle. Liyakuswela ukuze lilulame. Kakho loyedwa wenu ozalahlekelwa lalunwele ekhanda lakhe.” 35Esekutshilo lokhu, wathatha isinkwa wabonga kuNkulunkulu phambi kwabo bonke. Wasesihlephula wadla.

36Bonke baqunga isibindi base besidla labo.

37Sisonke sasingabantu abangamakhulu amabili lamatshumi ayisikhombisa lesithupha emkhunjini. 38Bathi sebedlile basutha, baphungula ukusindwa komkhumbi ngokuchithela amabele elwandle.

39Kwathi sekusile kabawunanzelelanga umhlabathi, kodwa babona itheku elilekhumbi elilitshebetshebe, base bezimisela ukuthi umkhumbi bayewuhuzulela khona nxa kuvuma.

40Baquma izisindo bazitshiya zicwila olwandle, baphinde njalo banyomula izintambo ezazibambe amaphini. Yikho base bephakamisa iseyili yaphambili beyiqondisa emoyeni, base beqonda ekhunjini. 41Kodwa umkhumbi wahuzuleka esidulini setshebetshebe olwandle wahle wabhajwa. Isihloko sawo sathi ngxi phansi asabe sisanyikinyeka, ingemuva yona yahlakazeka idutshuzwa ngamagagasi.

42Amabutho asesithi kungcono abulale izibotshwa ukuze kungabikhona esizantsheza sibaleke. 43Kodwa umphathi wekhulu wayefuna ukusindisa impilo kaPhawuli, yikho wasebalela ukuthi bakwenze lokho abase bekumisile. Walaya labo ababelamandla okuhlamba ukuba bazithele olwandle bona kuqala baqonde emhlabathini. 44Inengi lalizandenda ngamapulanka liyekhona loba ngasiqa bani somkhumbi. Ngale indlela wonke umuntu wafika emhlabathini ephephile.